NATO/OTAN

Öryggi er lykilþáttur í velferð okkar. Markmið Atlantshafsbandalagsins er að tryggja frelsi og öryggi aðildarríkjanna með umræðu á vettvangi stjórnmálanna og með sameiginlegum vörnum.

STJÓRNMÁL – Atlantshafsbandalagið styður við lýðræðisleg gildi og gerir aðildarríkjunum kleift að ráðfæra sig og vinna sameiginlega að varnar- og öryggismálum til að takast á við úrlausnarefni, efla traust og koma í veg fyrir átök til langframa.

HERMÁL – Atlantshafsbandalagið er skuldbundið til að leita ávallt friðsamlegra leiða við úrlausn deilumála. Ef ekki reynist unnt að leiða ágreining til lyktar með diplómatískum leiðum hefur bandalagið hernaðarlegt bolmagn til að grípa til aðgerða til að koma á stjórn á hættutímum. Það er gert samkvæmt ákvæðinu um sameiginlegar varnir, 5. grein Washington-sáttmálans, í umboði Sameinuðu þjóðanna, á eigin vegum eða í samvinnu við önnur ríki og alþjóðastofnanir.

Atlantshafsbandalagið fylgir staðfastlega þeirri grundvallarreglu að árás á eitt eða fleiri aðildarríki bandalagsins skuli túlka sem árás á þau öll. Þetta er megininntakið um sameiginlegar varnir sem kveðið er á um í 5. grein Washington-sáttmálans.

Hingað til hefur umrædd grein einungis verið virkjuð einu sinni; í kjölfar hryðjuverkaárásanna í Bandaríkjunum þann 11. september 2001.

NATO er varnarbandalag ríkja í Evrópu og Norður-Ameríku. Þannig skapar bandalagið einstök tengsl milli heimsálfanna og gerir aðildarríkjum kleift að ráðfæra sig og vinna saman að varnar- og öryggismálum, sem og sameiginlegum aðgerðum á hættutímum.

Í grunnstefnu Atlantshafsbandalagsins frá 2022 eru grundvallarverkefni, meginreglur og gildi þess tíunduð, sem og síbreytileg staða öryggismála og markmið bandalagsins næsta áratuginn. Stefnumótunin 2022 staðfestir að lykiltilgangur NATO er að tryggja sameiginlegar varnir aðildarríkja sinna, byggða á 360 gráðu aðferðafræði, og útlistar þrjú meginverkefni – fyrirbygging og varnir, forvarnir og stjórnun á hættutímum, og samvinnuöryggi.